قصة حبي
يا حبيبي قصة حبي
عايشه على طول بقلبي
كلها أنغام ورديه
كلها أحلام فضيه
إنمّا محتاجه لدنيا
أكبرمن كده بشويّه
يا حبيبي حبك جارف
وهيامك دايما عاصف
وسعادتي بيك وبيّه
يا حبيبي ميّه الميّه
انما محتاجه لدنيا
أكبر من كده بشويه
يا حبيبي حبك غنوه
ألحانها جميله وحلوه
وكلامها الصادق ليّه
مكتوب بحروف ذهبيّه
انما محتاجه لدنيا
أكبر من كده بشويّه
يا حبيبي حبك جنّه
وحدايق ورد وحنّه
وروايح رايحه وجايّه
ونسايم هاله عليّه
إنّما محتاجه لدنيا
أكبر من كده بشويّه
يا حبيبي حبك نعمه
يا حبيبي حبك قسمه
ده انت يا حبيبي هديّه
م السما جاتني يا عنيّه
إنّما محتاجه لدنيا
أكبر من كده بشويّه
غرام كلام
يا حبيبي من غير هواك
أو لقاك الدنيا هلاك
بسّ برضه رغم جفاك
لسّه قلبي وروحي معاك
إنمّا ليه حلفت زمان
راح تكون حياتنا أمان
وعشان إيه قلت كمان
مش هيفصل بينا مكان
يعني إيه مكانش غرام
ولا ده كان يا دوب كلام
يعني إيه مكانش هيام
ولا ده كدب وبان قوام
ليه كده أصبحت غريب
عن عينيّه يا أغلى حبيب
ليه بقى معادش نصيب
يا حبيبي والله عجيب
يا حبيبي هواك عسل
كان معايا وراح مثل
ليه بقى للهجر وصل
هو إيه كان يعني حصل
صارح
يا عمّ صارح بحبك
واشرح طبيعة خواطرك
يا عمّ حاول بقلبك
تعرف حقيقة مشاعرك
ليه بسّ خايف تصارح
باللي انت كاتمه يا عمري
ليه بسّ خايف تفاتح
هوّ الزمن لسّه بدري
يا عمّ صمتك ده أثّر
على وجودي وحياتي
يا عمّ بالعقل فكّر
وارحم سهادي وآهاتي
لو كنت مغرم وعاشق
مكانش قلبك سلاني
لو كنت مرهف وصادق
مكانش حبك ضناني
يا نور عيوني الليالي
كالموج بتجري وتجري
وانت وغرامك يا غالي
عايشين بقلبي وفكري
حبيت هواك
حبيت هواك من غير كسوف
من غير هواجس أو ظنون
حبيت وكان قلبي الشغوف
بالعشق أقرب للجنون
حبيت هواك والحبّ حق
لكل انسان في الوجود
شرطي الوحيد إخلاص وصدق
من غير نهايه أو حدود
في كل ثانيه يا جميل
قلبي معاك روحي معاك
وفي كل ناحيه مستحيل
أقدر أعيش الاّ بهواك
ويّاك أنا بنسى الزمان
بنسى العذاب بنسى الألم
ويّاك هنا عمري بأمان
من غير ضنا أو يوم ندم
الله عليك يا أحلى حب
يا اللي بهواك قلبي اهتدى
الله عليك يا أوفى قلب
يا اللي بلقاك عمري ابتدا
مغرور
سنين ونا عشقان هواك
عشقان جمالك وبهاك
بسّ الغرور خلاك أسير
للشكّ بالحبّ الكبير
والله حرام ويّا الجراح
أسهر وبات حتى الصباح
والله حرام في الليل أكون
رهن الهواجس والشجون
والله حرام من غير نصير
أمشي واسير دربي العسير
من غير أمل ليه برضاك
من غير نصيب إلاّ بجفاك
يا نور عيوني ليه كده
هوّ الغرور بالشكل ده
ده القلب داب والهجر طال
حتى الوصال أصبح محال
يرضيك عذاب قلبي الحزين
يرضيك ضياع حبّ السنين
والله عجيب ذنبي الوحيد
ويّا الحبيب حبّي الشديد
إزّاي هقابلك يوم ونول
وصلك وجمبك ميت عذول
وازاي هبادلك يوم هواك
والقلب محروم من لقاك
خلاص
يا اللي قتلت فيّه الغرام
بالهجر والصد والخصام
يا اللي زرعت فيّه الجراح
بالغدر والسهد للصباح
خلا ص بقى مليت جفاك
مليت غرامك وهواك
خلاص بقى حرّم وتاب
قلبي اللي من أشواقه داب
أحلى زمان عشناه سوى
بالحبّ والشوق والهوى
بس الغرور خلاك كده
قاسي وعنيد بالشكل ده
زعلان قوي وغاوي الغضب تقلان قوي ومن غير سبب عملت ايه حتى الضنا
والحزن حظي كام سنه
ليلة مبارح
ليلة مبارح ع سطح البيت
والناس سهرانه ومرتاحه
كان بينا كلام بسّ يا ريت
قلناه يا حبيبي بالراحه
همس العذال وملامهم
غمز الحساد وكلامهم
خلّونا لا قادرين نتكلّم
ولا بعنينا حتى نسلّم
مالكو انتو يا ناس بس ومالنا
ليه بقى شاغلين بالكو وبالنا
أيام وسنين وحنا في حالنا
لا روحنا لحد ولا حد جالنا
هتحسوا بإيه يا ناس بكره
لو شافكو عذول وغار منكو
هتحسوا بإيه ده لو مرّه
سمعكو حسود وقال عنكو
يا ريت يا عاذل تتعلّم
يا ريت يا حاسد تتندم
عشان لو كنا بنتألم
مش رايحين أبداً نستسلم
بحبك
بحبك حبيبي بحبك لأنك
مالكني بحبك فاتني بحسنك
بحب فيك صفاءك بحب فيك وفاءك
بحب فيك إباءك ونار كبرياءك
بحب فيك حنانك وطيبة فؤادك
وبشكر زمانك ع بهجة ودادك
بحب فيك دلالك وروعة غرامك
وبعشق وصالك ولوعة هيامك
بحبك ولطفك أسرني يا غالي
بحبك وظرفك سحرني ليالي
بحبك وحبك قدر وانقسم لي
قدر يا حبيبي رجع وابتسم لي
بحبك ومنك خيالي وفكري
وعنك كلامي ونثري وشعري
بحبك وروحي فداك يا حياتي
يا بلسم جروحي ودمعي وآهاتي
والله حرام
والله حرام بعد الغرام
بعد الموده والوئام
تمشي وتعديّ كالمنام
من غير ما حتى تقول سلام
معقوله متحسّ بندم
معقوله متحسّ بألم
والله الحياه بعدك عدم
والدنيا من دونك سأم
والله حرام تفضل بعيد
من غير سبب وافضل شريد
والله حرام تفضل عنيد
والهجر نار والشوق شديد
ليه يا حبيبي ان جيت اليك
فوق للفضا بصّت عينيك
وان يوم كمان عدّيت عليك
بلقى العواذل بين إيديك
إرحم بقى قلبي انكوى
من نار حنيني والجوى
إرجع بقى قبل الهوى
ميطير بقلبي في الهوا
هشكيك لمين
يا اللي هجرت من غير سبب
من غير ملامه أو عتب
هشكيك لمين للكريم
هو الرحيم هو العليم
طول ما انت متناسي الغرام
والحبّ والشوق والهيام
مش راح يأثر فيك عتاب
مهما الغياب طال والعذاب
عندك خلاص معادش فرق
بين حب وغدر بين كدب وصدق
حتى الحنان بتاع زمان
أصبح خداع غش وهوان
صابر أنا رغم الحنين
رغم الضنا رغم الأنين
حتى الدموع سالت لفوق
من كتر ما في القلب شوق
يرضيك أصون عهد الهوى
وتخون فؤادي اللي انكوى يرضيك أكون عنك غريب
من بعد ما كنت الحبيب
لمّا الغرام
لمّا الغرام عندك كلام
يا دوب تسالي والسلام
لأ مستحيل أعشق وميل
مهما كلامك كان جميل
مقدرش احب يا عم كده
مقدرش اميل بالشكل ده
أصل الفؤاد زي الشجر
محتاج وداد قدّ المطر
يا عم انا مش أيّ حد
تقدر عليه دون أي جهد
عندي الغرام مبدأ وجدود
مبدأ حياه من غير حدود
يا عم انا نفسي بجد
أعشق وحب لأقصى حد
نفسي بغرام ملوش مثيل
نفسي بهيام ملوش بديل
يا عم ليه حبك عذاب
ده العمر ولّى والشباب
يا عم ايه خلّى الهوى
عندك أماني في الهوا
يا عم أنا محتاج لمين
بالحبّ صادق وأمين
محتاج لمين حبه المتين
هيعيش مدى عمر السنين
وحياة غرامك
وحياة غرامك يا عنيّه
لا لون ولا طعم للدنيا
إلاّ بهواك ووصالك
ونور بهاك وجمالك
ده انت القمر في الليالي
وسط النجوم في الأعالي
وانت النسيم في العصريه
وانت النديم للصبحيه
وحياة عيونك الهاديه
وورود خدودك الناديه
هصون غرامك وحبك
وكون بقربك وجمبك
وحياة جمالك عيوني
عشقاك ورايداك جنوني
يا ربي إحميه وصونه
من كلّ حسّاد عيونه
وحياة غلاوتك زماني
من يوم محبّك سباني
نوّر وفتح بوجودك
زي الورود على خدودك
وحياة حلاوتك يا قلبي
هسقيك تمللي كاس حبي
هسقيك بإيدي السعاده
وكلّ ثانيه بزياده
لو حقيقي
يا حبيبي زاد عذابي
طول بعادك وغيابك
يا حبيبي ضاع شبابي
من عنادك وعتابك
لو حقيقي كنت عاشق
كان فؤادك حسّ بيّه
لو غرامك جد وصادق
كان ودادك بسّ ليّه
يا حبيبي امسح دموعي
والعذاب اللي في ضلوعي
يا حبيبي ارحم خضوعي
والهوان اللي في خنوعي
ليه المكابره والملاوعه
بعد متمنّيت هوايا
ليه المخاصمه والممانعه
بعد مترجّيت رضايا
يا حبيبي النوم جفاني
والسهاد سهّر عينيه
يا حبيبي الشوق كواني
والبعاد طوّل عليه
ليه بتتقل ليه بتبخل
بابتسامه أو بنظره
ليه بتغضب ليه بتزعل
هو انا قصّرت مره
التلفون
كل ميرن هالتلفون
بقلب وشي بكذا لون
وان طلعته من الصالون
بتحدّق فيّه العيون
بخده بعيد عشان شايف
نظرات العالم صوبي
بحكي بهمس عشان خايف
هالعالم تسمع قلبي
يا روح قلبي ليل ونهار
بستنى الرنه ع نار
بسأل عنك أهل الدار
واهل الحاره لعاشر جار
وحياتك مع كل رنه
بفرح برقص وبغني
حتى الناس لقراب منّي
عم بتحاكوا كتير عنّي
لو تبعت لي رساله
في الساعه راح أتألم
والحاله تبقى حاله
فيها الإشيا تتأزم
لو مرّه ما تحاكينا
من عمري ضاع كل اليوم
لو مرّه ما تناجينا
من جفني راح طعم النوم
ألوان
أخضر لقاك أحمر هواك
أسود جفاك أبيض صفاك
في كلّ حال شكل ومجال
ألوان هواك عدّوا الخيال
عند اللقا عند الوصال
ألوان هواك آخر جمال
حتى الزعل أكبر زعل
بروح قوام عند الغزل
القدّ بان عوده نما
والعين كمان بحر وسما
والخدّ أبيض ياسمين
والشعر أسود ع الجبين
الوشّ بدر والعطر ورد
والشفه زهر والبسمه شهد
السنّه لولي والكلام
سكر نبات على الدوام
كل مرّه
كل مره بتلمح في عيوني
نظرات الحبّ الجنوني
بظلك ماشي ومش خايف
وبتعمل نفسك مش شايف
بظلك ماشي ومتجاهل
فكرك هالنسيان بالساهل
بظلك ماشي ومش سائل
أو حتى شلونك مش قايل
شو السيره يا قلبي الحاير
في الدنيه شو هاللي صاير
وين الحب راح والإخلاص
ليش الود ضاع والإحساس
يا روح قلبي مش هتلاقي
زيّي في حبي واشتياقي
مش هتلاقي زيّي عاشق
مش هتلاقي زيّي صادق
كيف ممكن تسمع أنيني
من غير متحسّ بحنيني
كيف ممكن ترضى بلهيبي
من غير ميهزك نحيبي
لو ماشي ومش راجع تاني
والهجران نسّاك زماني
راح تفضل حبّي وغرامي
راح تفضل عشقي وهيامي
معرفش ليه
معرفش ليه صار مستحيل
الوصل بينا يا جميل
حتى الكلام ولا السلام
أصبح محال بينا وحرام
إيه غيّرك بالشكل ده
إيه حيّرك منتاش كده
هو الغرام عطف وحنان
ولا الغرام هجر وهوان
أجمل زمان عشناه سوى
بالحبّ والشوق والهوى
بسّ الهوى راح واختفى
لمّا انتهى عهد الوفا
ليه بس تصدّق قول عذول
أو حدّ حاسد حبنا
هيّه الشرائع والإصول
بتقول نخالف قلبنا
إشمعنى بس قلبي الأمين
فضل وفي رغم السنين
واشمعنى بس حبي الكبير
فضل كمان حبّ بضمير
بعد الفراق
لمّا الفراق يا عمري طال
عهد الغرام والحب زال
أمّا الوفاق لمّا ابتدا
قلبي إلى السعد اهتدى
كل الزعل بينا مضى
بعد القبل راح وانقضى
حتى الألم حتى الجفا
بعد الندم راح واختفى
من غير كلام سامحتني
من غير ملام صالحتني
حتى حنان قلبي الكبير
رجع وكان اكبر كتير
ورجعت لك ورجعت لي
وحلفت لك وحلفت لي
مهما العذول قال عننا
مش راح ينول شيء مننا
يا عمّ ليه
يا عمّ ليه قلبك كده
مغرور وسايق في الدلال
هو الغرام بالشكل ده
ولاّ الغرام قرب ووصال
يا عمّ قلبك في الغرام
قصده التسالي والكلام
مرّه القريب منك غريب
مرّه البعيد عنك قريب
لو كنت صادق بالهوى
كان من زمان قلبي في أمان
لو كنت عاشق كان سوى
عشنا في غرام حب وحنان
يا عمّ لو حبك هلاك
عمري وحياة قلبي فداك
يا عمّ انا مغرم هواك
مغرم جمالك وبهاك
متقولش
متقولش عن إنسان حبيب
حتى الحبيب يصبح نصيب
ياما القريب أصبح غريب
ياما الغريب أصبح قريب
يا عمّ مين يقدر يقول
في الحظّ إيه هيّه الأصول
برضه الغرام حظّ ونصيب
يمكن يصيب يمكن يخيب
رغم الوعود في الحب صدود
رغم العهود في الحب جحود
بسّ العجيب جوّه الفؤاد
وصل الحبيب هو المراد
مهما غدر مهما زعل
مهما هجر مهما تقل
ظلم الحبيب قيل في المثل
ع القلب أحلى م العسل
عشان كده بهمسة عتاب
كل الألم كل العذاب
هيزول وهيعود الشباب
للقلب من بعد الغياب
لا تفكريني
لا تفكريني مليونير
ونا الحقيقه مديونير
والله الحقيقه الصريحه
هيّه الطريقه المريحه
متغركيش الفتاكه
ولا الهدوم والشياكه
لا عندي ياخت وطياره
ولا يا حسره سياره
بخاف عليكي يا عيوني
من نار هوايا الجنوني
بخاف وبشتاق اليكي
رغم الشقاوه في عنيكي
بهاكي والله سحرني
ونور جمالك أسرني
بسّ الحكايه يا عمري
قلبي انجرح وضاق صدري
حبّيت كتير تفاض بيّه
ظلم الحبايب يا عنيّه
عشق العيون ضيّع قلبي
ضيّع حياتي ومش ذ نبي
نفسي أعيش بقى خالي
مرتاح بفكري وخيالي
من غير حبيب يحيّرني
وفي كلّ ليله يسهرني
عندي سؤال
يا ناس يا هو عندي استفسار
يا ريت هنا حد يشرح لي
عشان خلاص بقيت محتار
من كلّ حاجه بتحصل لي
ليه ان ضحك وحياني
وقال كلام له معاني
تاه الكلام على لساني
ونسيت زماني ومكاني
يا الله يا هانم يا الله يا بيه يا الله قولولي كل ده ليه
وانت هنا قول متخافش
وانت كمان مبتعرفش
ليه ان لمس بالإيد شعري
حسّيت بنار ماشيه في صدري
وان يوم همس وشم عطري
حبّيت اروح قوام وجري
ليه ان خطر زيّ النسمه
وقاللي بعنيه كام كلمه
ردّيت بنظره وبسمه
والقلب خايف م اللمه
أما بقى لو عدّى العصر
من غير مهل عليّه البدر
حسّيت بشوق كبير كالبحر
وخوف شديد عليه م الشر
لا تغالي
يا حبيباً ساكناً قلبي وخيالي
إن تشأ صدي وهجري لا تغالي
كم طلبت اللطف والرفق بحالي
بينما تقسو وحتى لا تبالي
كم دعوت الأمس قلبي للقاء
راجياً بدر الدجى طول البقاء
أمن المعقول أن تهوى شقائي
دون عذر غير قهري وابتلائي
يا حبيبي ان ترى خيراً بهجري
أطفىء النار التي ثارت في صدري
يا حبيبي إن سبرت اليوم صبري
لست أدري إن سيبقى حتى فجري
يا حبيبي إن تكابر قد تعاني
إنني أدرى بكم تهوى حناني
كلّ صدٍ وضياعٍ وهوان
لن يعيد العمر للماضي ثواني
يا حبيبي في الهوى ما لي اراده
قد سلبت القلب أسباب السياده
يا حبيبي صار هذا البعد عاده
بعد أن كانت لنا كلّ السعاده
ع الظاهر
يا حبيبي الناس محتاره
بطبيعة قلبي وقلبك
إنمّا إيه دخل الحاره
بحقيقة حبي وحبك
يا حبيبي دول لايمينا
وحاسدينا ليل ويا نهار
يا حبيبي دول ظالمينا
وحنا جيران والجار للجار
يا حبيبي الناس بتحكم
أحياناً على الظاهر
واحياناَ برضه بتفهم
أشياء لا ع البال والخاطر
ليه كده بس شاغلين بالكو
في غرامنا وسيرته أعوام
ليه كده بس شاغلين حالكو
في حاجات كلّها أوهام
فين زمانك راح يا جيره
فين زمانك راح يا طيبه
غيرش نار الشك والغيره
لسّه قايده ونار الغيبه
إنسان بسيط
يا عم أنا انسان بسيط
ميغرنيش دهب ومال
لكن بجد إنسان نشيط
بكسب وباكل بالحلال
عشان كده نفسي أعيش
مع حدّ زيي في الطباع
كلام كتير عندي مفيش
عايزين نعيش بالإقتناع
يا عم أنا نفسي بحبيب
قلبه العطوف مليان حنان
مقدرش احب انسان غريب
عني بطبيعته مهما كان
يا عم أنا مرضاش غرام
مرهون بمال دهب وماس
أصل الغرام ود وانسجام
وبالأساس من غير مساس
دلوقتي بس
دلوقتي بس بعد الفؤد
معتاد عليك خنت الوداد
دلوقتي بس بعد الهيام
مزداد إليك بعت الغرام
طب قلت ليه وياك هنا
هلقى السعاده والهنا
وحلفت ليه هنعيش سوى
من غير ملاوعه أو نوى
دلوقتي بس حسّيت بضيق
زيّ الغريق جوّه الحريق
دلوقتي بس خلّى الغرور
قلبك ملان كبر ونفور
دلوقتي بس ناوي الهرب
غاوي الغضب من غير سبب
دلوقتي بس نفسك تكون
حر وطليق حتى بجنون
خلاص نسيت أيام زمان
أيام صفا حبّ وحنان
خلاص بقيت إنسان غريب
ونا اللي كنت منك قريب
حسّك عينك
حسّك عينك يوم تتنازل
عن وعودك أو تتجاهل
حسّك عينك يوم تتخلّى
عن عهودك أو تتسلّى
حسّك عينك يوم تنساني
أو تخدعني أو تسلاني
حسّك عينك تنسى تجيني
قبل النار م الشوق تكويني
حسّك عينك وحياة عينك
يدخل عاذل بيني وبينك
حسّك عينك يوم نتفارق
أو نتباعد أو نتخانق
حسّك عينك تشغل بالي
ولا تغيّر قلبي وحالي
حسّك عينك يشمت فيه
أيٍّ كان في الدنيا ديه
حسّك عينك قلبك يزعل
أو يتجنى مره ويتقل
ده انت القلب اللي بيهديني
وانت الحب اللي بيحييني
هواك
هواك نصيبي في دنيتي
ملك فؤادي ومهجتي
هواك نعيمي وجنتي
سبب وجودي وبهجتي
شكرا حبيب قلبي الجميل
شكرا وشكري لك جزيل
مهما انحكى ومهما قيل
شكري وثنائي لك قليل
هواك سلام أمن وأمان
من المخاوف والهوان
هواك كمان هو الضمان
من الليالي والزمان
يا نور عيوني في الجمال
حبك وحسنك صار مثال
حتى هواك أصبح مجال
للفكر والفن والخيال
يا نور عيوني للفؤاد
حبك وطن حبك بلاد
هو المنى هو المراد
هو الهنا هو الوداد
الحظ
يا حظّ قوللي إنت ايه
صنع الخيال أو شيء أكيد
أياً تكون يا حظّ ليه
دايماً معايا بس عنيد
يا حظّ مين فتحت له
قلبك بفرحه عاش سعيد
ومين يا حظ قفلت له
قلبك بجرحه بات وحيد
يا حظّ لمّا تكون جميل
إزّاي بتختار بعضنا
وليه بقى دايما بخيل
مع الغلابه زيينا
يا حظّ بص هو الفقير
ملوهش قلب عشان يحب
ولا الكبير عشان كبير
هوّ اللي وحده عنده قلب
يا حظّ حس حتى التعيس
من حقه يفرح له بيوم
خلّيك حنيّن وونيس
عشان يجيلها في ليله نوم
أفكار وامواج
يا نور عيوني في صدري
أفكار كتيره بتسري
وامواج كبيره بتجري
بسنين حياتي وعمري
أرجوك أعني وساعدني
ولا انت غاوي تعاندي
أرجوك تعال وواعدني
ولا انت ناوي تكايدني
أفكار بتسرح يا غالي
لأيام سعيده بأمالي
وامواج بتسبح ليالي
لبلاد بعيده في خيالي
أفكار بتوصف غرامي
وليل سهادي وألامي
وامواج بتبعت سلامي
وعشق قلبي وهيامي
أفكار وأمواج حبيبي
بتقيد حنيني ولهيبي
لو بسّ ترجع نصيبي
لو بس تسمع نحيبي
طاير
جسمك هنا وقلبك بعيد
طاير مع الأحلام سعيد
جسمك هنا وفكرك شريد
حاير وحبي لك أكيد
معرفش ليه أصبح بخيل
بالوصل قلبك يا جميل
ده الليل تقيل قاسي وطويل
والويل شديد والنوم قليل
بسّ اعمل ايه أنا بهواك
ونا اشكي ليه والروح فداك
والله الحياه بعدك هلاك
ملهاش وجود إلاّ بلقاك
عمّال تدوّر عن حبيب
عنك بعيد عنك غريب
عمّال تفتش عن نصيب
وتفوت حبيب منك قريب
معرفش
معرفش ليه قلبك صبح
عنيد كده من غير سبب
معرفش إيه خلاّه جرح
قلبي اللي أجمل حب وهب
صدقت ليه كدب العذول
من غير متسمع كلمتي
هيّه الأصول يا بن الأصول
بتقول تدمّر دنيتي
قلبك وفي ودايماً جميل
بس للأسف بيّه غدر
صبرك كمان دايماً طويل
إلاّ معايا يا قمر
مغرور قوي مغرور بحق
عشان بجد ملكش زي
حتى القمر م الغيره انشق
عشان معادش عنده ضي
النهارده
بسّ النهارده بعد ما
بقيت لوحدي سنين شريد
بسّ النهارده عندما
بنيت حياتي من جديد
بسّ النهارده جاي تقول
مشاق لحب أيام زمان
سكت ليه لمّا العذول
خلاّك تروح وتغيب كمان
لمّا بكيت لك ما التقيت
منك ولا كلمة حنان
لمّا شكيت لك ما انتهيت
حتى رميتني للهوان
بصّ الغرام زيّ الزهور
محتاج لمين يتعب عليه
من غير رعايه أو شعور
ازاي يعيش ونحسّ بيه
رغم الحنين والشوق أنا
مقدرش لك تاني أكون
بعد العذاب بعد الضنا
مسمحش لك تاني تخون
يا حبيبي
يا حبيبي طال عذابي
طال سهادي من فتورك
يا حبيبي ضاع شبابي
ضاع فؤادي من نفورك
يا حبيبي العمر بيجري
وانت فاكره لسه بدري
دي السنين قبل الدقايق
راح تعدّي وانت رايق
يا حبيبي زاد حنيني
زاد أنيني من جحودك
يا حبيبي شوف جنوني
شوف ظنوني من صدودك
يا حبيبي الحبّ نظره
لو ده كان فعلاً حقيقي
والغرام برضه لمرّه
راح يعدّي في طريقي
أين
يا حبيبي الأصدقاء
أين كانوا ثم فلّوا
يا حبيبي الأقرباء
أين كانوا ثم ولّوا
قد تخلّى القوم عنك
بعد كبوٍ وانتكاس
قد تناسوا كيف منك
قد تدانوا بالتماس
ما تبقى كي يردّ
اللوم عنك غير حبي
ما تصدّى أو تحدّى
النيل منك غير قلبي
يا حبيبي في الحياة
نكاساتٌ تتعدد
والحياة للممات
بالصراع تتجدد
فادن مني يا حبيبي
لا تخف أو تتردد
كل شوقٍ أو لهيب
بالوصال يتبدد
يا عمّنا
يا عمّنا لقصتي
محتاج لحل قوام قوام
عشان خلاص دي فرصتي
هتضيع وده والله حرام
يا عمّنا قلبي عشق
إنسان غريب عن حيينا
ومع إني ويّاه بنتفق
عايزيني احب حد زيينا
يا عمّنا ده من زمان
والعرف والعاده هنا
بسّ القريب وابن المكان
هو اللي يتقدّم لنا
يا عّمنا إيه ذنبنا
لمّا القلوب تهوى وتميل
يا عمنا غير قلبنا
ملناش موجّه أو دليل
يا عمّنا ليه بس نكون
للعرف والعاده عبيد
وليه نكون من غيرعيون
تعشق كما تهوى وتريد
يا حب عجيب
يا حب عجيب أمر الحبيب
دايما بعيد عني وغريب
بشتاق إليه وخاف عليه
بسّ بهواه ملناش نصيب
يا حبّ لك على الأمير
قبل الفقير سلطان كبير
ياما سحرت ياما أسرت
اشمعنى بس قلبي الأسير
يرضيك أعيش في الكون وحيد
من غير حبيب لو من بعيد
يرضيك أسير دربي العسير
حيران حزين سرحان شريد
وازاي هبات من غير جليس
وازاي هنام من غير أنيس
ده الليل شجون يأس وظنون
طول ما الفؤاد جوّاه حبيس
انتظار
يا حبيبي بانتظارك
داب فؤادي وضاع شبابي
حتى إنك باعتذارك
مش هتطفي نار عذابي
جود بوصلك حتى تصفو
من جديد أيام حياتي
جود بحبك حتى أعفو
وانسى أحزاني وآهاتي
يا حبيبي مش هتمسح
بالكلام وحده دموعي
مش هتشفي بل هتجرح
بالبعاد قلبي وضلوعي
يا حبيبي ازاي هداري
عن عيون الناس غرامي
ده المكان نور بناري
والزمان حسّ بألآمي
يا حبيبي ارحم حنيني
واشتياق قلبي لعيونك
ده الوجود كله بأنيني
ضج طول محيا بدونك
إعتراف
يا حبيبي لا تلومني بل أعني
إن كشفت السر قهرا غصب عني
لا تسلني أي شيء لا تدعني
عرضة للنيل من حبّي ومني
يا حبيبي ليس في الأشواق عار
لا ولا في الحب عيبٌ أو شنار
يا حبيبي ليس للخوف اعتبار
في الهوى أصلاً ولا عنه اعتذار
يا حبيبي أنت مثلي في الغرام
قد حرمنا الوصل حساد الأنام
هل من المعقول نسيان الهيام
في جدال مستديمٍ أوملام
يا حبيبي بالوئام والوداد
لن يغيب الحب يوما عن فؤادي
إنّما بالبعد عني والعناد
سوف يحظى الحاسدون بالمراد
يا حبيبي أنت خلّي ونديمي
مثلما أنت جليسي في نعيمي
لا تدع رحماك ندّي أوغريمي
يحرم الأيام من خلٍ حميم
دون جوان
يا دون جوان اسمع بقى
مش كل طير لحمه طري
هجر وجوى غدر وشقا
مش ده الهوى في تصوري
يا عمّ بص ملّيت غزل
مليان خداع وزيف كتير
ملّيت كمان من غير زعل
إنسان لكبره صار أسير
يا عمّ شوف لك أيّ حد
يعشق عينيك بكلمتين
يا عمّ مين قال لك بجد
هنده عليك بغمزتين
يا عمّ لو شهد الكلام
مقدرش أعشق أو أميل
ده الحبّ عندي والغرام
مش بالكلام لو كان جميل
في ناس
في ناس كتيره للأسف
حاسده البشر من غير سبب
حتى اللي بينا من شغف
صار يتحسد والله عجب
ياما انتشر عنّا وكبر
وازداد كلام من حولنا
بسّ الكلام مهما كتر
مش راح يفرّق شملنا
معرفش ليه عند البشر
نقل الخبر أصبح متاح
حتى ولو سبب ضرر
للبعض منّا أو جراح
يا نور عيوني انسى الملام
وانسى الزعل وانسى العذاب
طول ما الغرام هو الغرام
مالناش ملام ملناش عتاب
إصبر حبيبي ع الحسود
واقرأ عليه سورة الفلق
مهما عمل مش راح يسود
هوّ الحسود في يوم صدق
نار غرامك
يا حبيبي نار غرامك
في الحشا قايده وصدري
إنّما أنوار هيامك
في الفضا ضاويه وعمري
يا حبيبي من حنانك
ابتديت أعشق حياتي
وابتديت بسّ في زمانك
أستعيد حبّي لذاتي
يا حبيبي صرت أعشق
بعد حبّك كل وجودي
قبل حبّك لو تصدّق
كنت مداري بجمودي
بسّ لمّا النور هداني
للعيون الحلوه ديّه
عاد وجودي وعاد كياني
حلو من تاني بعينيه
كن قويا
يا حبيبي كن قوياً كن صبورا
إن غدا سر الهوى يوماً جهورا لا تظن السر قد يبقى دهورا إن يدم شهرين أو حتى شهورا
أينما نمشي الهوينا أو نكون
حولنا همسٌ وغمزٌ وعيون
هل تشي الأطيار؟ هل تحكي الغصون؟
أم ترى الأزهار عن حقد تخون
يا حبيبي لن تنل يوماً سلاما
من عذولٍ لم يذق يوماً غراما
كيف تبغي اليوم حباً وهياما
من عذولٍ يملأ الكون ملاما
يا حبيبي كل سرٍ سوف ينقل
إن تعجل كشفه أو إن تأجل
من سيدري قد يكون الكشف أفضل
فالتلاقي قد يكون الآن أسهل
يا مقيماً
يا مقيما في البصر كم أعاني في السفر
من حنيني المستعر كاللجين المنصهر
يا حبيبي كالوتر أو كضوءٍ منكسر
صرت أبدو في السمر في البيادي والحضر
أين منّي يا قدري وصل شوقٍ للسحر
بين وردٍ أو شجر تحت نجمٍ أو قمر
ما تبقى للنظر في الليالي والسهر
غير ماضٍ مختصر في الهدايا والصور
ما لديا يا قمري من مرامٍ أو وطر
غير لقياك العطر دون خوفٍ أو حذر
فارو قلبي كالمطر في القريب المنتظر
فالوصال للبشر كالمياه للشجر
لسّه فاكر
لسّه فاكر يا حبيبي
كلّ حاجه بالتفاصيل
حتى فاكر يا نصيبي
نار لهيبي في المراسيل
كان غرامك عشق عمري
عشق روحي وكل وجودي
كان هيامك جوّه صدري
سرّ صبري وسر صمودي
لسّه فاكر كل قعده
تحت أشجار الخمايل
برضه فاكر كلّ ورده
ع الجبين أو ع الجدايل
لسّه فاكر كلّ رابيه
وكلّ قصة حب جميله
برضه فاكر كلّ ساقيه
وكلّ نسمة شوق عليله
لسّه فاكر كلّ غنوه
وكلّ كلمه وكلّ همسه
برضه فاكر كلّ نشوه
وكلّ بسمه وكلّ لمسه
لسّه فاكر كلّ رحله
في المواني والصحاري
برضه فاكر كلّ جوله
في المداين والبراري
لسّه فاكر كلّ ثانيه
عشتها ويّاك برقّه
برضه فاكر كلّ ناحيه
رحتها ويّاك بجرأه
بسّ يا خساره يا حبّي
كلّ شيء ضاع من إيديه
آه لو ترجع يا قلبي
كنت هفديها بعينيه
بعشق هواك
معقول كده من ده وده تصدق كلام
معقول كده مع ده وده توصّل ملام
لو يا قمر تنسى البشر واللي اتنشر
ده انت القدر خلاّك قمر واحلى خبر
ليه بس تغيب وتسيب حبيب من غير حنان
ليه بس تقيد وتعود تزيد فيّه الهوان
رغم البعاد رغم السهاد بالروح معاك
رغم الفتور رغم النفور بعشق هواك
مهما بكيت من طول جفاك عمري فداك
مهما شكيت من نار قساك عندي ملاك
ده انت الحبيب وانت النصيب وانت النديم
وانت الغرام وانت الهيام وانت النعيم
رجعت ليه
رجعت ليه بعد الهجران
اللي الزمن نسى جراحه
رجعت ليه بعد الحرمان
اللي اختفت عني اشباحه
نسيت عشانك ملامي
وسنين عذابي وهواني
نسيت سهادي وآلامي
ورجعت تاني بحناني
قلت الحبيب مدام جاني
بلا ش نقول ونعيد أسباب
بسّ الغريب رجع تاني
غشاش وخداع وكداب
رجعت ليه بس تحكيلي
عن الحنين اللي في قلبك
رجعت ليه بس تشكيلي
عن العذاب ونار حبك
رجعت ليه وانت ناوي
تبيع غرامي وودادي
رجعت ليه وانت غاوي
ضياع شبابي وفؤادي
قالت
قالت لي الحسناء مغرورةً
هل قلت شعراً قبل أن أظهرا
قلت معاذ الله إذ لم يكن
لي دافعٌ من قبل كي أنثرا
لكنّ قلبي منذ أن زرتني
والشعر فيه فائضٌ أنهرا
لم أدر ما ألقيت فاتنتي
حين اختلسنا بيننا النظرا
هل كان سحراً ما أصبت به
أم كان سهماً منك قد صدرا
كم ليلةٍ أمضيتها أرقاً
للبدر أشكو اليأس والضجرا
ما مرّ بي طيفٌ يشاطرني
سهدي الذي قد جاوز السحرا
حتى التقينا صدفةً سنحت
فاهتز قلبي حينما انبهرا
ما كان وصفٌ للورى يقنعني
حتى أنرت النجم والقمرا
يوم لنا جاد الزمان به
يا صاحبي ما أكرم القدرا
قد صرت من أهل الهوى عندما
شاهدت بدراً حسنه ندرا
في روضةٍ ازهارها هلّلت
والجدول الصافي كذا كبّرا
حبٌ غزا قلبي فأهلا به
لن أشتكي حتى وإن دمرا
ما أروع الحبّ وأغلاله
حذار أن تبلى وان تكسرا
أسرٌ لعمري بتّ في قيده
منعماً بالسعد مستبشرا
من لم يذق طعم الهوى لم يعش
لا عمر إلاّ ما الهوى سطرا
ما الحبّ إلاّ نعمةٌ يا أخي
غيثٌ يعمّ القلب كي يزهرا
فاعشق أخي حتى يحين الردى
ما مات من يهوى وإن قبرا
ملاح
ملاح أنا والبحر ليّه ودود
والموج بساط تحتي بقاله عقود
سواح أنا والبدر ليّه صديق
والليل وشاح خمري بنجمه مضيء
ملاح سنين ويا النسيم والريّاح
جوّه السفين شفت النعيم والملاح
لا في يوم بكيت من نار فراق وبعاد
ولا اشتكيت من طول حنين وسهاد
حتى القدر من غير خبر خلّى القمر
لمّا ظهر وسط البشر بالحب أمر
شفت الجمال شفت الدلال واالمنى
عشت الحنان عشت الأمان والهنا
قدّ الفضا قدّ السما والبحار
عشنا الهوى وحنا سوى ليل نهار زرنا المواني والقرى ع الجبال
لسّه الخطاوي ع الثرى والرمال
بسّ الهوى طار في الهوا والمدى
لمّا الوصول حان والنزول ابتدا
كلّ الغرام تحت السما والشموع
راح واختفى لما انطفى م الدموع
حبي ليك
جايز أكون إنسان بسيط
مملكش مال أو جاه وصيت
بسّ الهوى عندي كبير
قدّ المحيط واكبر كتير
أصل الغرام إحساس جميل
ملوهش زي ولا مثيل
شوف كم ملك أمير وشاه
ساب كلّ شيء عشان هواه
حبّي إليك يا عم شديد
بسّ الغرور خلاّك عنيد
رغم البعاد رغم النوى
صنت الوداد صنت الهوى
يا عمّ ليه قاسي كده
هوّ الغرام بالشكل ده
حتى الغرور ده له حدود
والكبر والعند والصدود
يا عم أنا بعشق هواك
بعشق بهاك بعشق لقاك
بسّ الزمان هيضيع قوام من غير حنان بينا وغرام
خدني الكلام
خدني الكلام فوق للسحاب
على بساط حبّ وغرام
بسّ الحقيقه كان سراب
مكانش أكتر من كلام
ليه خدتني وعشمتني
وقلت لي حبّك هنا
ليه خنتني ليه سيبتني
من غير هواك وحدي هنا
قلت الوداد بينا أكيد
هيكون شديد مهما حصل
قلت الفؤاد هيكون سعيد
والسعد راح يصبح مثل
قلت الحبيب هيكون نصيب
من غير ملاوعه أو خداع
بسّ الغريب حتى العجيب
ما نابني منه غير ضياع
هوّ الغرام كلّه كده
هوّ الغرام شيء مستحيل
ولاّ الغرام من ده وده
رغم العذاب والشوق جميل
فريده
والنبي يا فريده في بهاكي فريده
إنّما يا فريده في حماكي وحيده
ليه كده يا فريده ليه كده يا صبيّه
ياما كنت سعيده ياما كنت هنيّه
يا فريده ده نورك في الدنيا مفيش زيّه
ده القمر بحضورك راح منّه سناه وضيّه
يا ترى إيه جرى لك في ليالي عديده
يا ترى إيه حصل لك تبقيتي شريده
يا فريده الضحكايه على ثغرك بترفرف
وتمللي النسمايه على شعرك بتهفهف
إيه اللي شغل بالك وسهّر عيونك
إيه اللي قلب حالك وشعلل ظنونك
دي القلوب بغرامك وهيامك سهرانه
والعيون بدلالك وجمالك سرحانه
يا فريده عذابك ده باين في عينيكي
ومن كتر غيابك بخاف والله عليكي
ما دام هواك
ما دام هواك نار يا جميل
هتزيد قساك كمان بإيه
وان كان رضاك شيء مستحيل
هحتاج لقاك يا عمّ ليه
هتقوللي إيه بعد الغياب
بعد الصدود بعد الضياع
هتعيد لي إيه بعد العذاب
بعد الجحود بعد الخداع
أصل الغرام والحب وفاق
واصل الهيام والود وئام
عمر الغرام ما كان خناق
عمر الهيام ما كان خصام
لو كان هواك فعلا صحيح
كان قلبي داق طعم الحنان
لو كان لغاك أصلا صريح
كان من زمان حسّ بأمان
يا عمّ إيه خلاّك تكون
قاسي وعنيد بالشكل ده
يا عمّ ليه وياك بهون
هو الغرام عندك كده
ملّيت
بهواك سنين بسّ العناد
خلّى الفؤاد ملّ السهاد
بهواك سنين بسّ البعاد
خلّى الوداد بعدك رماد
ملّيت خلاص م الإنتظار
من غير جواب أو اعتذار
ده الليل معاك أصبح نهار
والحزن صار عندي مزار
مقدرش اكون كبش الفدا
مقدرش اعيش بالشكل ده
ليه الغرام بينا انقضى
من قبل ما حتى ابتدا
سنين ونا بحلم يسود
بينا الوفاق زيّ الوعود
سنين ونا بحلم يعود
بينا الغرام من غير حدود
إن كنت ناوي ع الفراق
قوللي بقى من غير خناق
وان كنت ناوي ع الوفاق
قوللي كده من غير نفاق
يا عمّ روح
يا عمّ روح سيبني في حالي
مش ده الغرام اللي في بالي
يا تحب بجد حب حقيقي
يا تبتعد عن طريقي
ده الكون بحاله يا عنيّه
في كفه والحب في التانيه
بحلم بحب وشوق كبير
زيّ القصص والأساطير
إن كنت مش قده صارح
عشان فتورك ده جارح
ده الحبّ عندي نار قايده
مش ميّه جامده أو بارده
فكّر بقى وشوف لك حل
عشان فؤادي منك مل
إن قلت لك حاجه بتنسى
وان ملت لك برضه بتقسى
لو خاب
لو خاب رجاءك في الحبيب
اللي افتكرته في يوم نصيب
لو داب فؤادك م الصدود
وضاع ودادك م الجحود
اللازمه
إسمع كلام أهل الهوى
ملكش غير صبرك دوى
فيه الشفا فيه النجاه
لو يوم جفا أو طال نواه
لو طال حنين قلبك سنين
وليل سهادك زاد أنين
لا اللوم هينفع والعتاب
مع اللي عشقان الغياب
اللازمه
لو كان حبيبك والزمان
لتنين عليك نازلين هوان
لو خدت هجر ودّيت حنان
وشفت غدر ودّيت أمان
اللازمه
لو عشت طول عمرك أمين
والحبّ كان جواك متين
لو كنت عاشق والحنين
خلاّك تبات الليل حزين
اللازمه
وصف الحبيب
يا ناس حبيبي مستحيل حد يوصفه
أحلى الكلام لو كان جميل لا ينصفه
لكن هحاول باجتهادي أرسمه
عشان تشوفوا ليه فؤادي مغرمه
يا ناس جماله في الزمن ده شيء عجيب
حتى القمر غار واستحى ومش غريب
هوّ الغرام هوّ الهيام هوّ النصيب
مهما حصل مهما جرى هوّ الحبيب
يا ناس حبيبي في الحقيقه والخيال
رمز المحبّه والوداد رمز الجمال
يا ناس ظريف طبعه ولطيف عند الوصال
حتى الزعل زيّ العسل وقت الدلال
يا ناس عفيف حبّه وشريف ومن زمان
لا نار عذاب أو قول عتاب فيه أو هوان
حتى المكان قبل الزمان أصبح أمان
والناس كمان بالنور غمرها والحنان
No comments:
Post a Comment