مرّت سنه
مرّ سنه وجات سنه
وانت وانا لسّه في خصام
والله حرام بعد الهنا
والشوق هنا تنسى الغرام
يعني اللي كان ويّاك ده إيه
وهم وخيال أو كان بجد
لو كان غرام ضاع بسّ ليه
ولاّ العناد فاق كلّ حد
عملت إيه قوللي بقى
حتى الفراق طال والبعاد
هوّ الغرام غلب وشقا
ولا انت بس غاوي العناد
معرفش ليه أصبح غريب
أمرك معايا يا قمر
ونا اللي كنت أقرب حبيب
وأقرب من العين للبصر
حبيت هواك وانت كمان
بادلتني نفس الشعور
راح فين بقى الحب والحنان
وليه ابتدا بينا الفتور
ساعات لوحدي يا جميل
بحتار وبتسائل كتير
إزاي وليه صار مستحيل
بينا الوصال فين الضمير
عد حبيبي
يا حبيبي آه لو تأتي إليّا
قبل أن تقضي الوشايات عليّا
يا أعزّ الناس في الدنيا لديّا
عد رجاءاً مثلما كنت نديّا
يا حبيبي بعد شوق ٍ دام عمري
ما الّذي تبغيه من صدي وهجري
هل من المعقول يا شمسي وبدري
أن تريد اليوم بعد الوصل هجري
يا حبيبي كنت أرجو أن تراعي
عهد حبي باندفاع ٍ واقتناع
ليس أن تسعى لما فيه ضياعي
دون عذرٍ يا حبيبي أو وداع
يا حبيبي إنظر الأيام تجري
في سكون ٍ دون أن أدري وتدري
هل من الإنصاف أن تجري بعمري
دون أن تدري بأحوالي وأمري
برضه عاشقك
مهما تزعل مهما تبعد
مهما تتقل مهما تعند
مهما تنسى ومهما تهجر
مهما تقسى ومهما تغدر
اللازمه
مش هلومك مش هعاتبك
ولاّ حتى في يوم هحاسبك
فيش بإيدي غير اسامحك
يا حبيب قلبي وصالحك
مهما توعد مهما تحلف
هتقابلني ثمّ تخلف
مهما أسمع من وشايه
عن برود قلبك معايا
اللازمه
مهما أشكي من جنونك
ولاّ أبكي من ظنونك
مهما يخدعني كلامك
عن هيامك وغرامك
اللازمه
مش هتقدر
يا حبيبي مهما تزعل
مش هتقدر تنسى حبي
برضه قلبك مهما يتقل
مش هيقدر يسلى قلبي
كلّ شيء في الدنيا جاير
يتنسي من ذكرياتك
كلّ شيء لو كنت عايز
إلاّ حبّ سنين حياتك
ياما قبلك حدّ فكّر
ينسى حبه الأوّلاني
مهما فكّر مش هيقدر
غيرش بس يفتكره تاني
فكرك انت بالبساطه
تبتعد وتعيش بدوني
ولاّ يلزم لك وساطه
حتى تفرح بيك عيوني
يا حبيبي والله رايدك
حتى لو ضيّعت عمري
مش هعاندك ولا كايدك
للكريم فوضت أمري
يا دنيا
يا دنيا غنّي وزغرتي
من بعد غربه وشوق طويل
عشان حبيبي ومهجتي
قرّب معاد وصله الجميل
يا قلبي قوم واصحى بقى
وافتح عيونك ع الحياه
بالحب والشوق واللقا
هتعود لمجراها المياه
يا قلبي طير وانسى الجراح
وافرد جناحك من جديد
بكره الوصال ومن الصباح
هيخلّي يومك أحلى عيد
يا قلبي غنّي للقمر
واملا الوجود حب وحنان
بلاش نلوم تاني القدر
ولاّ البشر ولاّ الزمان
يا قلبي من دلوقتي عيش
وافرح ونول كل المرام
ده من النهارده لأ مفيش
غير بسّ أفراح الغرام
مش هقول لك
مش هقول لك يا حبيبي
إن قلبي بيك متيّم
مش هقول لك لو لهيبي
ع الخدود أثّر وعلّم
مش هقول لك يوم بحبك
ياحبيب قلبي وعيوني
حتى أسمع قبله قلبك
يعترف لي بحب جنوني
مش هقول لك إنت روحي
وانت قلبي وانت عمري
مهما طال سهدي ونوحي
ولاّ طال وجدي وصبري
مش هقول لك إنّك انت
نور حياة قلبي وعينيّه
حتى لو معرفش إمتى
راح تحن وتخاف عليّه
يا حبيبي كنت ناوي
من زمان احكي وقول لك
بسّ قلبك شفته غاوي
ذلّي ببرودك وتقلك
كلّك ذوق
كلّك ذوق يا حبيبي
كلّك رقّه وحنيّه
كلّك ذوق يا نصيبي
من زمان لسنين جايّه
كلّك ذوق والذوق زوّق
أيامي عمري بغرامك
كلّك ذوق والذوق حقق
أحلام قلبي بهيامك
كلكّ ذوق يا مسلّيني
يا اللي بحسنك ساحرني
كلّك ذوق يا مهنّيني
يا اللي بحبك آسرني
كلّك ذوق بكلامك
لمّا تجيني وتحكيلي
كلّك ذوق بملامك
حتى ان جيت تشكيلي
كلّك ذوق وانت قاعد
تسمعني وتلاغيني
كلّك ذوق لمّا تواعد
وتجيني وتلاقيني
كلّك ذوق وانت غايب
وبتكتب في الجوابات
قدّ إيه قلبك دايب
م الأشواق والذكريا
مستني
قلبي الحزين يا حبيبي
مستني لحظة رجوعك
مستني م الشوق لهيبي
في الليل يقيد شموعك
مستني ترجع بقربك
أفراح غرامنا وهيامنا
مستني تمسح بحبك
أحزان فراقنا وخصامنا
يا نور عينيّه دخيلك
تعبت من طول بعادك
لو كان عليّه أجيلك
لو بسّ أعرف بلادك
معقوله قلبك صار ناسي
أجمل غرام في الدنيا دي
هوّ انت بالطبع قاسي
ولاّ المكابره شيء عادي
يا عمري إرجع وكفايه
ضيّعت قلبي وقلبك
لكلّ شيء حد ونهايه
حتى الملاوعه في حبك
نظرة ولمسه
نظرة عينيك البريئه
نسّتني ذلّي وهواني
لمسة إيديك الجريئه
هزّت وجودي وكياني
تقولش سحر في نظراتك
من غير إرادتي سباني
ولاّ الهوى في لمساتك
من غير درايتي رماني
بنظرتك يا حبيبي
ريحتني من عذابي
وبلمستك يا نصيبي
رجعتني لشبابي
بنظرتك فتّح قلبي
من بعد غفوه تقيله
وبلمستك نوّر دربي
من بعد ظلمه طويله
بنظرتك شفت الدنيا
حلوه وجميله في عينيه
وبلمستك عشت في ثانيه
في دنيا تانيه غير ديّه
بنظرتك شفت الطرحه
قدام عينيه بتلالي
وبلمستك عشت الفرحه
والدنيا صارت تحلالي
لو قلبي فكّر
لو قلبي فكّر وخبّى عنك
كان قلبي وفّر جراحه منك
إكمني عاشق تقلان عليّه
واكمني صادق بتشكّ فيّه
لأ يا حبيبي خلّيك في حالك
منتاش نصيبي لو مش ع بالك
معادش تنفع بينا المعادله
معادش تشفع إلاّ المقابله
معقوله أسهر عشان عيونك
وبات افكّر وعيش بدونك
إزاي هتنصف وازاي هترحم
من غير متعرف أو حتى تفهم
يا عمّ ياما قلبي شرح لك
في الحب كرامه مين كان سمح لك
تجرح شعوري من غير مناسبه
لو كان قصوري ملناش معاتبه
كان قلبي لك
كان قلبي لك وعقلي لك
وعمري كان بسنينه لك
كان عهدي لك ووعدي لك
وودي كان بصدقه لك
بسّ انت رحت من غير وداع
ونا اللي تهت في سنين ضياع
دلوقتي بس بعد السنين
للحيّ جاي مليان حنين
طب كنت فين أيام زمان
لمّا اشتكيت مرّ الهوان
وكنت فين لمّا الدموع
ع الخد سالت كالشموع
فكرك أنا هشتاق إليك
بعد الوداد مهان عليك
فكرك بنظره من عينيك
هرجع وهركع بين إيديك
لأ يا حبيبي فوق بقى
عهد الركوع راح والشقا
معرفش إيه خلاك تعود
غدر الزمان ولاّ الوجود
معرفش ليه حتى أنا
بعدت أصلا ً كام سنه
مهما العذر كان والسبب
ملّيت هواك إيه العجب
قبل المكابره
قبل المكابره والغرور
والهجر ليّّه والنفور
قبل الملاوعه والعناد
والغدر بيّه والبعاد
كنت الحبيب رمز الوفا
رمز المحبه والصفا
كنت النصيب لحن الغزل
لحن الموده والأمل
قبل الخصام قبل النوى
عشنا الغرام عشنا الهوى
بسّ العذول الله يجازيه
صعب عليه اللي احنا فيه
كان يجرى إيه لو ملت لي
ورجعت ليّه وقلت لي
مين غيري كان يسأل عليك
مين غيري كان يشتاق إليك
ظلمت روحك ليه كده
هوّ الغرام بالشكل ده
سمعت ليه بسّ للعذول
ونسيت غرامي والأصول
عدّيت عليه
عدّيت عليّه يا جميل
من بعد غربه وليل طويل
عدّيت عليّه من سكات
كأنّي لسّه في الشتات
لا رجعت ليك مليان حنين
ولا حلمت بيك طول سنين
رجعت ليه يعني أنا
إن كنت هتسيبني هنا
سنين ونا بشقى عشان
نقدر نعيش سوى بأمان
بسّ انت يا خساره نسيت
إني عشان خاطرك شقيت
غدرت بيّه وخنتني
وبعت حبي وبعتني
مكانش أولى تنتظر
لحدّ مرجع مقتدر
فضلت مال عني ودهب
لو بالحرام كان مكتسب
الله يسامحك ده الغريب
كان والله أرحم م الحبيب
معجزه
يا عمري حبك معجزه
في الوقت جاتني منقذه
من بعد ما قلبي كفر
بالحبّ والشوق والبشر
خليك معايا يا قمر
مهما الزمن طال والسفر
معادش فيّه اعشق وميل
من بعد حبك يا جميل
وهبت قلبي للغرام
والحب والشوق والهيام
حبيت كتير وشقيت كتير
لحدّ مرضيت في الأخير
ياما انظلم قلبي وتاه
في البحث عن حبه وهواه
حتى النصيب ولاّ القدر
بعث حبيبي المنتظر
حبك يا عمري كان منى
قلبي وروحي كام سنه
يا ريت يا أحلى حبّ كان
يا ريت قابلتك من زمان
كلّ ما اشكيلك
كلّ مشكيلك شجوني
يا حبيب قلبي وعيوني
تقسى وتغيب عنّي أكتر
حتى شوقي بقلبي يكبر
لأ مفيش يا عمري حاجه
للغياب عشان دي حاجه
مش هتفرق شيء معايا
مش هتنقص من هوايا
يا حبيبي مهما تتقل
ولاّ تهجر ولا تزعل
مش بإيدي يا حياتي
أنسى حبك وانت ذاتي
مش بإيدي حتى احاسبك
ولا الومك ولاّ اعاتبك
ده انت روحي وانت قلبي
وانت عشقي وانت حبّي
بسّ عايزك تفتكرني
يا حبيبي وتنتظرني
زي مقلبك كان يطالب
كلّ مرّه وكان يعاتب
فين زمانك
كلّ يوم يا نور عيوني
من بعيد بلمح عيونك
كلّ يوم وبشوق جنوني
بستعيد أيام وصالك
يا حبيبي من حنيني
واشتياقي عايز اجيلك
بسّ بين شكّي ويقيني
تاه سبيلي عن سبيلك
فين زمانك يا حبيبي
فين حنانك وحلاوتك
ليه كده خلّيت نصيبي
نار بعادك وقساوتك
يا حبيبي جمب منك
عشت أجمل وقت ليّه
بسّ وجدي وبعدي عنك
طيّر النوم من عينيّه
لو بإيدي كنت هنساك
زيّ مانت نسيت هوايا
إنّما وعشان بهواك
بنسى وجدي وطول شقايا
ضحكت الدنيا
ضحكت الدنيا حبيبي
وابتسم ليّه زماني
لمّا صار حبك نصيبي
والجمال خدني وسباني
ضحكت الدنيا لقلبي
يا حبيب قلبي وعيوني
والأمل نوّر ع دربي
بعد ما انزاحت ظنوني
ياما قلبي بات ليالي
يشتكي من نار غرامه
وانت خالي وغير مبالي
بانشغاله وهيامه
بسّ لمّا اشتأقت ليّه
والغرام داعب خيالك
من عبير الودّ فيّه
ألف مرسال مني جالك
يا حبيبي عيش معايا
للأبد واسعد بحبي
ده انت عشقي وهوايا
وانت نور عيني وقلبي
بلاش تقول
بلاش تقوللي بموت فيك
لمّا تلاغيني ولاغيك
يا ريت تقوللي بعيش بيك
لمّا تناجيني وناجيك
يا نور عيوني في زمانك
بعيش وبحيا في جنّه
من غير هواك أو حنانك
هوّ الوجود ده له معنى
ياما الزمان فات وعدّى
وانت وغرامك ع بالي
ياما الفؤاد بالمودّه
عاش وانتصر ع الليالي
يا نور عيوني غرامنا
قصه وحكايه جميله
هتعيش بشوقنا وهيامنا
مدى الليالي الطويله
متخافش يا نور عيوني
لسّه الغرام في البدايه
متخافش ده الشوق جنوني
والقلب مغرم للنهايه
ملكش حق
ملكش حق من أيّ حد تغير بجد
عشان هوايا وحبي لك ملهومش حد
ملكش حق غير بسّ من نفسك تغير
عشان لوحدك بعشقك وبكل ضمير
من منين تغير وليه تغير ونا بهواك
مغرم سنين وبنور جمالك وبهاك
حق القمر منك يغير قبل البشر
عشان جبينك لسّه أجمل م القمر
يا نور عيون قلبي أنا بشتاق إليك
من قبل حتى مالتقيك واعشق عينيك
في الحلم شفتك كلّ ليله وفي النهار
ياما وصل طيفك خيالي وياما زار
بعد الكلام ده يا قمر معقول تعيش
محتار وخايف واغلى من حبك مفيش
إفرح وفرّح ياقمر قلبي بلقاك
دي العيشه حلوه والنبي بسّ في حماك
كلّ ما اشتاق
كلّ ماشتاق لك حبيبي
ولاّ أحتاج لك شويّه
فجأه ألقاك يا حبيبي
من جديد قدّام عينيّه
هوّ إيه بسّ الشعور ده
ولاّ ده الإحساس يا ربي
حاسه سادسه ولا واحده
من آياتك جوّه قلبي
كلّ ما تخيّل وقوفك
جمب مني بتناجيني
بعد لحظه اسمع وشوفك
بتشاور لي وتناديني
كلّ ماحلم بيك وفتّح
ولاّ افكّر فيك دقيقه
قبل مصحا الحلم يصبح
جدّ قدامي وحقيقه
يا حبيبي في كلّ ثانيه
إنت أقرب ليّه مني
حتى وانت في ناحيه تانيه
مش هتبعد برضه عني
لو خطر ع البال خيالك
ولاّ زاد وجدي وشجوني
كنت هتجود لي بوصالك
قبل متغمض عيوني
أنت في قلبي
لا تقل لي يا حبيبي
أين تأوي أو تقيم
أنت في قلبي وعيني
طالما أحيا مقيم
لا تقل أين تغدو
أو تروح أو تهيم
طالما أنت الخليل
والحبيب والنديم
أينما كنت حبيبي
في بحارٍ أو قفار
أنت في فكري وعقلي
أنت في بيتي وداري
هل يغيب البدر يوماً
عن مسارٍ أو مدار
أو يصير اليوم ليلاً
دون ضوءٍ من نهار
لا تظنّن حبيبي
بعد هجرٍ أو فراق
سوف يخبو ما في قلبي
من لهيب الإشتياق
أنظر الساعة عمري
بعد هجرٍ وافتراق
كيف أنّ العقربين
يرجعان للتلاقي
نحن صنوان حبيبي
في الغرام والحنان
لم ير التاريخ حباً
مثلنا مدى الزمان
لست أبغي غير عيش ٍ
في سلام ٍ وأمان
دون ذل ٍ لكلينا
أو عذاب ٍ أو هوان
شايلك
شايلك في قلبي وصدري
مهما الزمان طال وعدّى
شايلك في عقلي وفكري
رمز الحنان والمودّه
حبّك في كفّه يا عمري
والكون ده كلّه في كفّه
حسنك فيه رقّه يا بدري
والظلّ برضه فيه خفّه
يا أغلى من روحي عندي
وأحلى م الدنيا ديّه
عهد عليّه يا وعدي
هفديك بقلبي وعينيّه
كرمال عييونك وقلبك
هبيع حياتي بلهفه
من غير غرامك وحبك
مقدرش اعيش لو للحظه
وحياة جمالك يا حبي
وسنين وصالك ده ليّه
هصون غرامك في قلبي
مهما الزمان عمل فيّه
يعني إيه
يعني إيه ملناش نصيب في بعضنا
يعني إيه حبّ السنين ضاع منّنا
فين نذورنا فين قسمنا وعهدنا
ليه كده بالعند غابوم عنّنا
يجرى إيه لو بسّ نتازل سوى
يجرى إيه لو كلّ واحد شويّه تاب
في الغرام والحبّ والشوق والهوى
مستحيل نحيا بدون شكوى وعتاب
يا حبيبي بصّ لي واسمع كلام
قلب عاشق من زمان هدّه الحنين
ليه تضيّع بالمكابره والخصام
حبّ عايش جوّه قلبي من سنين
يا حبيبي لوعنادك زاد وطال
والفراق أصبح نصيبنا للأبد
برضه صورتك هتقابلني في الخيال
ده الخيال سلطان لذاته مش لحد
مش هقول لك بكره هنساك يا جميل
والزمن هوّ الكفيل والمستعان
طول مقلبي ونبضه عايش مستحيل
لو للحظه أنسى حبك مهما كان
من غير معاد
من غير معاد بينا وخبر
صدفه تقابلنا يا قمر
على الطريق وحنا في سفر
كان أحلى يوم واحلى قدر
لحظة لقاك قلبي انبهر
قلبي انسحر قلبي انأسر
لحظة لقاك قلبي انغمر
بالحبّ والود كالمطر
ياما انكوى قلبي وصبر
ياما انشغل بك وانتظر
ياما اشتكى ياما انكسر
م الوجد والشوق والسهر
يا نور عيوني ما خطر
ع البال اشوفك في السمر
زيّ النسيم لمّا انتشر
فوق الروابي والشجر
خدني الهوى بالمختصر
لمّا القمر بصّ ونظر
ياما الهوى ع الناس أمر
من قبل مني وانتصر
إن كنت قاصد
إن كنت قاصد بالكلام
يا نور عيون قلبي الخصام
أو كنت قاصد بالملام
بسّ الملاوعه في الغرام
اتقل وخاصم يا جميل
وازعل كمان من غير دليل
أمّا أنا بالمستحيل
أعشق وحب بعدك وميل
هنده عليك واسأل عليك
واتمنى أحيا بين إيديك
هشتاق إليك واحتاج إليك
مهما بعدت وحياة عينيك
مش كلّ يوم في حال أنا
تروح هناك وجيك هنا
هوّ الغرام سعد وهنا
ولاّ الغرام بعد وضنا
تعّبت قلبي ليه بهواك
ضيعّت عمري ليه بجفاك
إكمني عشقان نور بهاك
تحرم عيوني من لقاك
عيناك
عيناك في كلّ مكان ومكان
تلاحقانني وفي كلّ أوان
أكوكبان حول قلبي يلمعان
أم نيزكان حوله يشتعلان؟
عيناك يا نور حياتي زورقان
بين الجمال والخيال تبحران
كم تسعدان القلب حين تدنوان
وكم تؤرقانه لو تنأيان
عيناك ما أصلهما فيروزتان
ياقوتتان أم ترى لؤلؤتان
من تاج سلطان أتت أو صولجان؟
لا بل هما معجزتا هذا الزمان
عيناك يا حبيبتي رمز الحنان
رمز الوداد والغرام والأمان
أيّا تكونان فحتى الهذيان
قد أوصلاني ألهذا تسعيان؟
غريبه
أنت اللي زعلان غريبه
ده نا اللي من حقي أزعل
وانت اللي تقلان عجيبه
أنا اللي من حقي أتقل
مين فينا بس هوّ الغلطان
مين فينا بس هوّ القاسي
أنا اللي قلبي سنين عشقان
ولاّ اللي قلبه سنين ناسي
لو قلت لك حاجه في قلبي
مش ممكن أكتر تتأجل
تزعل قوي وتقول حبي
معادش خالص زي أوّل
لو جيت اصالحك في الهاتف
بتقفل السكه في وشي
ولو بقى شفتك واقف
على الرصيف قوام تمشي
فين راح كلامك يا عمري
عن المحبه والإخلاص
إزاي بثانيه ومن بدري
أصبح كلام بدون إحساس
فين الغرام اللي ياما
حكيت لي عنه بروّيه
دلوقتي كلّ الملامه
في الحبّ صارت عليّه
لو يوم حصل وجرحتك
من غير مقلبي كان قاصد
ياما انجرحت وسامحتك
مع إن جرحك كان جامد
أنت في عقلي
أنت في عقلي وقلبي
في سهادي أو منامي
منذ أن هيّجت حبي
واشتياقي واحترامي
يا حبيبي سل دموعي
بعد أن جفّت لديّا
كيف أنمت في ضلوعي
حبّك الغالي عليّا
هل رأى الحب حبيبي
عاشقا مثلي شغوفا
بعد أن صرت نصيبي
صرت عن أمسي عزوفا
من صباح ٍ لمساء
دائم التفكير عقلي
لست أرجو من سمائي
غير أن تصبو لوصلي
لم أعش من قبل حباً
هائجاً كالبحر فيّا
لم أجد في الناس قلباً
صافياً كالمزن ليّا
يا إلاهي صن غرامي
من عيون الحاسدينا
واحمني واحفظ هيامي
من قلوب الحاقدينا
أقرأ في عينيك
أقرأ في عينيك يا حبيبتي
أشياء لا أفهم حقاً أمرها
عشقٌ وشوقٌ ما بدا لي يا ترى
أم أننّي أجهل أيضاً سرّّها
يا حلوتي بالرغم من عشقي لها
فالعين قد تخفي بخبث ٍ غدرها
كم من عيون ٍ خلتها شفافةً
لكنّها أخفت بقصد ٍمكرها
وكم سواها غازلت وأوقعت
في الحبّ قلبي حين ألقت سحرها
لكنّه منها جميعاً لم ينل
رغم الوعود الكثر إلاّ أسرها
كيف أعي من بعد هذا كنهها
وكيف لي أن أجيدنّ سبرها
كم من معان ٍ مبهماتٍ حولها
كالموج تهوي ثمّ تعلو بحرها
لو كان شوقاً ما أراه أو هوىً
فالحقّ يقضي أن تجافي كبرها
أمّا أنا فالعشق أمرٌ واقعٌ
سيّان أبدت حلوها أم مرّها
حينما هيّجت قلبي
لست أدري يا حبيبي
حينما هيّجت حبي
صرت حقاً من نصيبي
أم ترى ضيّعت عمري
كيف تسعى لوداعي
قبل أن تأتي لوصلي
كيف ترضى بخداعي
بعد أن أصبحت خلّي
ما الّذي تخشاه مني
لا تخف قل ما تشاء
إن حكى العذّال عني
قل لهم هذا هراء
قد وعدت القلب عشقاً
فيه ودٌ وحنان
لو بحق ٍ قلت صدقاً
ما غزا قلبي الهوان
هل تظنّ الحبّ وعداً
كاذباً دون اشتياق
أم ترى قد صار عهداً
للرياء والنفاق
كلّ ما أرجوه قلباً
صادقا قولاً وفعلا
لست أرجو منك حباً
زائفا أصلا ً وشكل
أريد الوصال
اريد الوصال فقط يا حبيبي
لإن الفراق سقامي ودائي
أريد الوصال أجل يا طبيبي
ففيه دوائي وفيه شفائي
فجد لي بوصل ٍ سريع ٍ يداوي
عذابي ووجدي وقلبي العليلا
فوالله ما العيش شيئاً يساوي
إذا لم أجد للوصال سبيلا
حبيبي تعال فما لي سواكا
وما لي حياةٌ بغير هواكا
فإمّا نعيش معاً في حماكا
وإمّا أموت وأفنى فداكا
حبيبي وإن طال هجري سنينا
ما تخلّيت عن هواك ثواني
وإن بتّ ليلي وحيداً حزينا
ما تمنّيت أن تعيش هواني
حبيبي أغثني وخفف عذابي
حبيبي أعنّي على سوء حالي
فقد ضاع عمري وضاع شبابي
بهجرٍ طويلٍ يفوق احتمالي
صدّقيني
صدّقيني لو حقيقي بتعشقيني
أهجريني وابعديني عن عيونك
صدّقيني أتركيني واهمليني
حتى لو ضاعت سنين عمري بدونك
صدّقيني لمّا اقولك إنت عمري
وانت أجمل شيء حصل لي في حياتي
صدّقيني لمّا اقولك إنت بدري
وانت شمسي في الوجود ده وانت ذاتي
صدّقيني عشق قلبي لك مانعني
من ضياع عمرك وحسنك جمب مني
بسّ قلبك يا حياتي مش سامعني
مهما اقول لك أو أعيد لك مش فاهمني
كلّ محكي لك وقرّب فكري منك
تزعلي لي وتشتكي لي من جحودي
رغم إني مستحيل يبعدني عنك
غير غرام قلبي اللي أغلى من وجودي
يا حياتي نفسي اضمك نفسي اشيلك
جوّه قلبي وجوّه صدري وفي عيوني
يا حبيبي نفسي احبك نفسي اجيلك
بسّ خايف ع الجمال ده من جنوني
صباح الحب
صباح الحب يا أحلى حب وهب ربي
صباح الحب يا أغلى حب ملك قلبي
صباح الحب يا أطيب قلب صباح النور
عدد رملات عدد موجات تلال وبحور
صباح الحب على الحلوين صباح الورد
صباح الحب على العاشقين صباح السعد
صباح الحبّ من قلبي صباح نادي
صباح الحبّ من روحي صباح هادي
صباح الحبّ يا عنيّه صباح الخير
صباح الحبّ مع أنغام يمامه وطير
صباح الحبّ يا شمسي ويا بدري
يا أغلى عندي من نفسي ومن عمري
صباح الحبّ والأشواق إلى عيونك
صباح الحبّ من مشتاق إلى فنونك
صباح الحبّ والعرفان على ظرفك
على حبك على حسنك على لطفك
اللي بريدك
اللي بريدك ريده
وبإيدك حط إيده
واللي بعيبك سيبه
لا تلومه ولا تعيبه
بالحبّ قلبك ملّيه
معطاء دايما خلّيه
مهما الناس راح تقسى
بكره الناس راح تنسى
يا عم طوّل بالك
حتى تروق أحوالك
ليه بتزعل ع الفاضي
ليه بتتقل متراضي
يا عمّ ارضى وصالح
يا عمّ اهدا وسامح
لو حتى كنت مظلوم
أو مرّه كنت محروم
يا عم هالعالم فيه
أحزان والله تكفّيه
ليه نزيدها ونقيدها ليه
هيفيدنا ده بسّ بإيه
يا عم ازرع دربك
بالحب وافتح قلبك
حتى الدنيا تضحك لك
والناس ديّه تفرح بك
معقول تخون
معقول تخون قلبي الوفي
اللي بهواك عاش مكتفي
ده كان هواك حبّي الكبير
أوّل غرام ليّه وأخير
إرحم بقى وخلّيك رؤوف
خليّك حنون زيّي وعطوف
ليه بس تسيبني للعذاب
من بعد ما ولّى الشباب
يا نور عيوني ليه الوصال
صار مستحيل بينا ومحال
هوّ اللي كان عشق وغرام
ولاّ اللي كان حلم في منام
يا نور عيون قلبي أنا
شوف غبت عنّي كام سنه
من غير مكالمه أو جواب
لو حتى كان همسة عتاب
معقول خلاص في البعد هان
حبّي اللي كان شعلة حنان
معقول خلاص الودّ راح
ويّا العواصف والرّياح
ازّاي هعيش من غير هواك
من غير وصالك ولقاك
وازاي هنام وازاي هقوم
من غير مشوفك كلّ يوم
هنيّالي
هنيّالي على حبك هنيّالي
هنيّالي على قلبك هنيّالي
هنيّالي على لطفك يا أحلى حب
هنيّالي على ظرفك يا أطيب قلب
هنيّالي على قصة هواك ليّه
هنيّالي على فرصة لقاك بيّه
هنيّالي على وعدك تصون حبي
هنيّالي على عهدك تكون جمبي
هنيّالي على أجمل حبيب في الكون
حبيب بوجوده صار للدنيا طعم ولون
هنيّالي على وصلك وأشواقك
هنيّالي على نبلك وأخلاقك
هنيّالي على أجمل حياه ويّاك
بلا أحزان ولا أشجان عشان بهواك
هنيّالي على فنك يا نور العين
هنيّالي على حسنك يا حلو وزين
هنيّالي وبتمنى السلام للناس
بدون تمييز ولا تفريق بين الأجناس
هنيّالي وبترجى الهنا والسعد
لكلّ الناس بكلّّ الحب وكلّ الود
والله القدر
والله القدر ليّه ابتسم
لمّا القمر بالوصل جاد
والله النصيب ليّه انقسم
لمّا الحبيب من تاني عاد
والله بهواك عمري ابتدا
بعد الأسى بعد الضنا
والله بلقاك قلبي اهتدا
للحب والنور والهنا
حتى الأمل في الناس رجع
من بعد ما كان راح وخاب
من بعد ما قلبك سمع
وجد وأنين قلبي اللي داب
نوّرت قلبي يا قمر
بنور جمالك وبهاك
حرّرت قلبي م الضجر
بذوق كلامك ولغاك
الله عليك يا أحلى حب
يا اللي انت جيتني في المعاد
الله عليك يا أغلى قلب
يا اللي انت نسّيتني السهاد
الله عليك يا مهجتي
يا فرحتي ويا بسمتي
الله عليك يا بهجتي
يا منيتي ويا قسمتي
حبي وغرامي
حبّي وغرامي كالمطر
وكالعواصف والرّياح
لو بسّ ترجع يا قمر
وتعوّض العمر اللي راح
يا نور عيون قلبي أنا
بعدت ليه عنّي كده
هوّ الغرام هجر وضنا
ولاّ البعاد بالشكل ده
أيّام زمان وحنا سوى
عشنا بأمان عشنا بحنان
من غير معانده أو جوى
أو نار ملاوعه أو هوان
أيّام زمان لمّا الغرام
قرّب وجمّع شملنا
عشنا بمودّه وانسجام
رغم العواذل حولنا
بسّ النّهارده للأسف
فضلت وحدي في المكان
معادش فيك ذاك الشغف
أو حتى شوق أيام زمان
بين بحر أزرق
بين بحر أزرق ورمل أصفر
بين عشب أخضر وورد أحمر
ويّاك يا عمري بعيش وبسهر
يا نور عيوني بحب وبعشق
جمال عيونك عشان دي أعمق
من المحيط ده والبحر الازرق
والرمل الاصفر جميل وناعم
ع الشط راسي سنين ونايم
والقلب سارح معاك وهايم
والعشب الاخضر بساط يا عمري
بالودّ والحب مفروش ومغري
عشان نعدّي عليه ونجري
والورد الاحمر يا حلو يا اسمر
جميل وفتح بديع ونوّر
غير بسّ حسنك يا حلو أكتر
عندك مانع
عندك مانع يا نور عيوني
أحبّ واعشق نور جمالك
عندك مانع بشوق جنوني
أشوف بقلبي طيف خيالك
عندك مانع يا عمّ احبك
وموت في حبك طول حياتي
عندك مانع أعيش بقربك
لو حتى قلبك جار يوماتي
عندك مانع أجاري نفسي
وخلّي سيرتك شغل عمري
عندك مانع أداري يأسي
وخبّي صورتك جوّه صدري
عندك مانع أعيش عشانك
وصون غرامك مهما تزعل
عندك مانع أقول حنانك
هيكون نصيبي مهما تتقل
عندك مانع أنسى القرايب
عشان عيونك يا حبيبي
عندك مانع أسلى الحبايب
لو حتى قلبك مش داري بي
عندك مانع يا عمّ تنصف
قلبي اللي عايش عشان عيونك
من غير عيونك حتى تعرف
إن كنت هقدر أعيش بدونك
بفضل حبك
بفضل حبك حياتي أفضل
وعمري أحلى وزماني أجمل
بفضل قلبك وعشق قلبك
نوّر وفتح في القلب حبك
بفضل حسنك ونور جمالك
برقص وغنّي في ليل وصالك
بفضل ظنك وحسنه فيّه
أيّام حياتي بقت هنيّه
بفضل صدقك وذوق كلامك
من غير ملاوعه بعيش غرامك
وبفضل عشقك م الهمّ خالي
مرتاح بفكري مرتاح ببالي
بفضلك انت نسيت عذابي
ونسيت ضياعي وضياع شبابي
ولاجلك انت هعيش حياتي
يا عشق عمري وكنه ذاتي
يسلم لي حبك
يا نور عيوني بحبك
من كل قلبي وبقول لك
يسلم لي حبك وقلبك
يسلم لي ضيّك وظلك
من بعد ما كنت خالي
وكنت مرتاح بفكري
ملكت قلبي وخيالي
بنور جمالك يا عمري
للحبّ سلمت أمري
والحب أوامره مجابه
في القلب شيلتك يا بدري
والقلب مغرم صبابه
بهواك وبعشق عيونك
والعشق سيطر عليه
بهواك وصدّق بدونك
مقدرش اعيش لو لثانيه
شمس النهار حته منك
ونور جمالها مرايتك
والبدر غار واحكى عنك
والدنيا عرفت حكايتك
بكلّمك
أرجوك متزعلش مني
لو قلت لك غصب عني
بكلّمك كلّ ساعه
أو حتى كل نصّ ساعه
كلمة بحبك للعشاق
بتصبّر القلب المشتاق
هيّه اللي بتريّح قلبي
هيّه اللي بتنور دربي
مقدرش وحياة غرامك
مسمعش أنغام كلامك
مقدرش اخبي وداري
شوقي وحنيني وناري
بحبّ أسمع تمللي
همسة شفايفك تقوللي
إنت غرامي ومنايا
وانت هيامي وهنايا
مشبعش انا يا حبيبي
من قول حياتي وحبيبي
مشبعش انا من عيونك
وحتى من نار جنونك
يا حبّ عمري
يا حبّ عمري يا قمر
يا منوّر الليل والسهر
بهواك وبعشق نور عينيك
مهما انحكى وتقال عليك
بلاش نقول ونعيد كلام
عذّال وحساد للغرام
بلاش نشمتهم بنا
وحياة حبيبنا وربنا
يا نور عيون قلبي الأمين
بشتاق إليك وفي كلّ حين
بشتاق إليك رغم الفتن
في السرّ أو حتى العلن
طول ما انت جمبي يا جميل
ميهمنيش أي قال وقيل
ميهمنيش غير حبي ليك
وعشقي ليك ووصلي بيك
عشان عيونك يا قمر
هقف قصاد كلّ البشر
ولاجل حبّك يا قمر
هركب ع موجات الخطر
ده الموت حياه عشان هواك
والعيشه موت من غير لقاك
عشان كده ويّاك هعيش
قصة غرام مبتنتهيش
نصيبي الصدود
بشتاق إليك يا حبيبي
بشتاق وبعشق جمالك
بسّ الصدود كان نصيبي
مش السعاده بوصالك
يا نور عيوني الموّده
مفروض تنوّر دروبنا
مفروض بقوّه وبشدّه
ع الحبّ تجمع قلوبنا
أمّا الغرور والمكابره
ع الحبّ والعشق نقمه
برضه النفور والمثابره
ع الصدّ ملهومش لزمه
مش قادر اصدق ضميرك
مرتاح وراضي بهواني
من بعد ما كان مصيرك
مرهون بحبي وحناني
ده الحب والعشق جنّه
حلوه وجميله في عينيّه
دول مش مجامله ومنّه
من ايّ حد أو هديّه
قدّ المجرّه
قدّ المجرّه والمطر
والتلج ع الأرض والشجر
بعشق جمالك يا قمر
يا منوّر الكون والبشر
يا نور عيوني مستحيل
أوصف حبيب قلبي الجميل
مهما انحكى ومهما قيل
عليك شويّه وبيك قليل
لو قلت لك حبي الكبير
قد البحار واكبر كتير
صدّق عشان قلبي الصغير
مغرم صبابه وبضمير
صدّق كمان لو قلت لك
بعشق هواك وبعشقك
من قبل حتى معرفك
وشوف جمالك واسمعك
بالقلب شفتك والخيال
قبل الموده والوصال
في الحسن والزين والجمال
مكانش لك في الناس مثال
ولمّا شفتك في الصباح
والخد نوّر بان ولاح
قلت الربيع بالعطر فاح
بعد العواصف والرياح
أخرجي
يا من عشقت عذابي
ولم يزدك عتابي
سوى الحنين لهجري
أو اللجوء لقهري
يا من قتلت ودادي
بالكبر أو بالعناد
يا من سرقت مراحي
بالسهد حتى الصباح
اللازمه
هيّا اخرجي من كياني
ومن سنين زماني
هيّا اخرجي من ضلوعي
ومن سيول دموعي
اللازمه
هيّا اخرجي من فؤادي
ومن مروج ودادي
هيّا اخرجي من خيالي
ومن جنان وصالي
اللازمه
يا من هواك سراب
وبلقعٌ وضباب
يا من جفاك طويل
والملقى فيه قتيل
اللازمه
يا من أضعت حياتي
من بعد ما كنت ذاتي
يا من غرورك غطى
كل الكواكب سخطا
اللازمه
يا من عشقت هواكي
وكان فيه هلاكي
يا من حسبتك روحي
فصرت ضمن جروحي
اللازمه
يا من وهبتك حبي
وعشق عمري وقلبي
كيف استبحت دمائي
ومهجتي ووفائي
اللازمه
أحب هواك
أحب هواك ففيه جنون
وفيه خيالٌ وفيه فنون
بغير هواك حياتي تهون
بغير رضاك أنا لا أكون
أميل إليك ولا أستكين
ويحمل شوقي إليك السكون
أغار عليك وسوف أصون
غرام حياتي فدتك العيون
حبيبي يضجّ ويعلو الحنين
وبين الضلوع غرام دفين
حبيبي لقد مسّ عندي الأنين
عنان السماء وأنت المعين
حبيبي تمرّ وتجري السنين
وقلبي أسير العذاب سجين
فقل لي حبيبي وأنت الفطين
لماذا بأمري فقط تستهين
جاي تعمل ايه
جاي تعمل ايه دلوقتي بس
لمّا الزمن بالعمر راح
وجايّ ليه دلوقتي بص
تلج المشيب في الشعر لاح
طب كنت فين من كام سنه
لمّا الشباب بالعطر فاح
لمّا الهنا كل الهنا
كان من نصيبي والنجاح
جاي تعمل ايه بعد السنين
مجرّحت قلبي كمان
هوّ الزمان ولا الحنين
خلوا الحياه ماشيه بأمان
يا عمّ والله مصدقك
بكلّ كلمه عن هواك
ونا الحقيقه بعشقك
بعشق جمالك وبهاك
بس الجمال ده يا قمر
من حقّ حد غيري تمام
مش حقّ حد زيّي انكسر
من قبل منك في الغرام
مقدرش اسمح للغرور
عن الحقيقه يمنعك
مقدرش حتى لو تثور
أرضى لغروري يخدعك
متقولش عنك يا جميل
إن انت مش قدّ المقام
حتى اللي زيّك مستحيل
نلقى المثيل له في الغرام
حبك بعث
وحياة غلاوتك يا قمر
حبك بعث فيّه الحياه
زيّ المطر لمّا غمر
أرض الصحاري بالمياه
حبك بعث واحيا الأمل
بالحبّ تاني والبشر
حتى الربيع ويّاك وصل
لمّا الخريف كان منتظر
حبك يا عمري كان مراد
قلبي المتيّم من زمان
ياما انتظر همسة وداد
ياما انتظر لمسة حنان
بسّ الحقيقه لمّا جيت
يا نور عيون قلبي أنا
عمّرت جوّه القلب بيت
بالسعد عمران والهنا
كلّ العذاب راح وانقضى
بنظره منك نلتها
حتى الهوان قبلك مضى
بكلمه واحده قلتها
كلمة بحبك يا جميل
بكلّ صدق نطقتها
ونا الحقيقه مستحيل
غير بسّ اقول صدّقتها
رغم بعدي
نفسي اقولك يا حياتي
رغم بعدي عن عيونك
مستحيل حتى مماتي
تسعد الأيام بدونك
نفسي اقولك إنّ قلبي
لسّه مغرم بيك يا عمري
نفسي اقولك إنّ حبي
لسّه عايش جوّه صدري
بسّ هجرك كان ضروري
يا حبيب قلبي وعينيّه
حتى ترتاح من فتوري
ومن ظروفي الصعبه ديّه
يا حبيبي مش هتقدر
للأسف تفهم غرامي
مهما اصوّر أو أعبر
عن حنيني وعن هيامي
فكرك اني خنت قلبك
بعد ما اتعلقت بيّه
فكرك اني بعت حبك
بعد ما تشوقت ليّه
يا حبيبي والله أفضل
ليّه أفنى من خداعك
حتى أهون ليّه واسهل
تنتقدني من ضياعك
يا حبيبي صدّق انك
راح تكون دايما ع بالي
راح تعيش مع سوء ظنك
جوّه قلبي وفي خيالي
يعني إيه
يعني إيه مفيش أمل
نرجع سوى زيّ زمان
يعني أيه مهما انعمل
ولاّ انحكى فاتنا الآوان
هوّ اللي بينا كان ده إيه
كدب وخداع ولاّ غرام
إن كان ده كدب كدبت ليه
مش كنت تمشي والسلام
معقول يا ناس حبّ السنين
كده بسهوله يتنسي
أحبّ مين وميل لمين
من بعد ما قلبك قسي
وهبت لك قلبي بعشق
وملت لك من غير حدود
وهبت لك حبي بصدق
وخدت إيه غير الجحود
لو كنت غلطان يا قمر
مليش عليك همسة عتاب
بسّ انت واخد ع السفر
مهما الزمن طال والغياب
No comments:
Post a Comment